80 millioner bilder – Norsk kulturhistorisk fotografi 1855-2005
Fotografisk dokumentmateriale på nasjonal utstilling
Torsdag 16. okt. 2008 opna kulturminister Trond Giske utstillinga 80 millioner bilder – Norsk kulturhistorisk fotografi 1855-2005 på Nasjonalbiblioteket i Oslo.
Utstillinga og ei stor bok med same tittel er eit samarbeidstiltak mellom Nasjonalbiblioteket i Oslo og Preus museum, det nasjonale fotomuseet i Horten og resultat av ein nasjonal dugnad. I juni 2007 fekk nemleg alle bevaringsinstitusjonar i landet spørsmål frå Nasjonalbiblioteket og Preus museum om å senda inn forslag på fotografisk materiale i seriar frå offentlege og private arkiv. Materialet skulle visa breidda i norsk bruksfotografi.
Ut frå dei innkomne forslaga valde utstillings- og redaksjonskomiteen ut seriar frå 35 ulike nasjonale bevaringsinstitusjonar. Frå Rogaland er det fotografi frå tre privatarkiv ved Statsarkivet i Stavanger: fotofirmaet Hannchen Jacobsen & Co A/S, Stavanger Turistforening og bedriftsarkivet Rosenberg Mekaniske Verksted A/S. Dessutan viser ein fotografiserie i album (1914) frå Havnedirektoratet sitt arkiv ved Riksarkivet hamneanlegget på Utsira og på Røvær ved Haugesund.
Det utlånte originalmaterialet vert no vist i klima- og lysregulerte utstillingslokale på Nasjonalbiblioteket og på Preus museum. Fotografia frå før 1905 er utstilte i Oslo, og fotografia frå etter 1905 i Horten. Alle fotografia frå Rogaland er utstilte på Preus museum i Horten.
Den store boka presenterer også alle fotografia i naturleg storleik og har eit kort introduksjonskapittel til kvar serie.
Tre skjermar i utstillingslokala presenterer digitale versjonar av dei fleste fotografia institusjonane sende inn som forslag i første omgang, men som ikkje vart valde ut til utstillinga og boka. Her finst ein serie frå Kamerun som tilhøyrer Misjonsarkivet, Misjonshøgskolen i Stavanger.
Dei to utstillingane varer til 31. jan. 2009. Boka er for sal både på Nasjonalbiblioteket, Preus museum og hos bokhandlarane.
